估唔到我念力發揮作用，日想夜想千層蛋糕，終於佢開咗中環店疏散咁啲人流，不費吹灰之力，排咗 10 零分鐘就買到。
我私人覺得，Lady M 嘅創辦人一定係世界上另一個我，唔係嘅話點解佢出嘅招牌蛋糕都係我鍾意食嘅口味呀？人氣度最高嘅 Signature Mille Crêpes 原味千層蛋糕同 Banana Mille Feuille 法式香蕉千層酥，仲有我手上嗰個中環店限定 Earl Grey Mille Crêpes 伯爵茶千層蛋糕，未食我都知道我好鍾意食啦。
Lady M 有幾威水，好多 OL 仲清楚過我，但我吃咗一啖 Signature Mille Crêpes，嘩！不得了，啲班戟皮好香好脆，中間啲 cream 鬆泡泡，好輕好軟又輕甜，但最令我覺得 amazing 係嗰陣蛋味好香，而且仲有好香焦糖味，禁唔住八卦之火焰，搵咗 PR 姐姐問下 Lady M 嘅秘密，知道每塊班戟皮都是人手逐塊逐塊煎的，每個千層蛋糕由 24 - 27 塊班戟皮組成，真係煎到人都癲先有咁好味。由零開始做，一個 cake 要 30 小時才做起，真係每啖都係心血，千祈唔好食剩咁嘥呀。
好多人都知我勁愛 Earl Grey 茶，我今次都係衝住呢個全球獨家限定嘅伯爵菜千層蛋糕而來，Base 都係一樣，不過中間嘅忌廉就加咗法國 Earl Grey 茶打咗忌廉，面層有伯爵茶葉碎粒及矢車菊花花瓣，茶味好香，我覺得呢款比原味輕怡。棋盤蛋糕係 Lady M 嘅大人氣款式，終於空降中環店，如果你係死硬 fans，要試喎。
我知好多人想賣原個 Lady M 畀朋友家人做生日，但大家都知超級難訂，我都訂咗好耐先訂到。提提大家記住留意佢哋嘅 facebook，每月嘅開始預訂日期都會喺嗰度公布，人家手快你手慢，就無 cake 食囉。
Lady M
地址：中環金融街 8 號國際金融中心商場二樓 2096A 號舖
電話：2865 1099
營業時間：星期一至六 10am-9pm，星期日 10am-8pm
備註：1. 原個蛋糕須於 www.ladymhk.com 預訂，須早 3 日前預訂，2 月開始朱古力棋盤蛋糕
2. 堂食每人最多可柯打 3 件，外賣每人最多可購 6 件
歡迎你 like 我哋 U Food Facebook Page / U Food Instagram ，取得我哋更新更快嘅資訊！
