講真呢...隻藍色呢...就令我眼球跌咗出嚟，究竟呢隻色點嚟，落場人肉測試，即刻話過你知。
隔住個 mon 見到咁正宗嘅「藍」芝士，見慣世面的我都忍唔住 O 咗嘴。我估十個鄉民，加埋我共十一個都會問呢款藍過藍精靈嘅「藍」芝士究竟係咩嚟？本住慌張西望嘅精神，貼身追訪咗舖頭老闆 Jack，謎底終於解開，原來係法國嚟嘅薰衣草芝士。
大家淡定，個藍芝士原來唔係加色素變出嚟，而係 Jack 親身到咗薰衣草之鄉——法南一帶搵返嚟嘅，芝士加咗天然嘅薰衣草做出藍色，無加人造色素，純品過鍾嘉欣，最重要係食落只有淡淡嘅薰衣草味，唔使擔心感覺似食 lavander hand cream，problem solved！
睇圖大家都明咗 7 成啦，此佔主攻英美兩地好似魚蛋燒賣咁 hit 嘅街頭小食 grilled cheese，有人譯做「慢烤芝士三文治」，精妙位咪係要慢慢烤、唔准烘燶、但中間芝士又要半融，慢火烘一件都要 5 分鐘左右，Jack 引入有發熱壓板嘅扒爐，將塗滿牛油嘅麵包先烘，夾了芝士後以壓板加熱烘，在以大約 180 - 193℃ 慢烤，麵包金黃挺身，用刀刮，會發出「嚓嚓」嘅聲音，聽到都覺得脆。
最正係有超勁量嘅半融嘅芝士，呢度最 base 的 grilled cheese 「芝味之選」都用咗 Mozzarella、Cheddar、Gruyère、Emmental 4 款芝士，另外可以追加藍色嘅薰衣草、紅色嘅番茄或綠色嘅羅勒芝士，番茄同羅勒芝士都係法南直送，作為芝士控，好難抗拒得到？
純芝士外，其實仲有「健康家族」、「美國隊長」、「墨西哥總統」同「野蠻女友」等有餡口味，會加松子仁、炒香磨菇、焦糖洋葱、墨西哥辣牛肉醬、墨西哥甜辣椒、韓式豬腩肉、辣泡菜等，餡料全 homemade，原材料則係街巿買返嚟，唔好話怕肥嘟嘟，comfort food 唔肥唔 comfort 㗎。
開心首選 $35（普通）、$42（勁量）
唔理你為呃 like 定真身係芝士控，呢款招牌三文治裏面有芝士七重天，因為包括了 Mozzarella、Cheddar、Gruyère、Emmental、番茄芝士、薰衣草芝士及羅勒芝士 7 款，薰衣草味唔濃，夾埋其餘 6 款芝士食，奶味同鹹香不俗，但難得唔會鹹到涸喉，吐司脆到咬下去「咔」一聲，有牛油香，半份已飽到飛天。
野蠻女友 $35（普通）、$42（勁量）
有「芝味無窮」裏的 4 款芝士，但加了韓式豬腩肉、辣泡菜及甜粟米，豬腩肉炒得脆口，泡菜辣辣地好惹味，豬肉同泡菜夾埋芝士食感覺反而無咁飽膩。
燒「蕉」雪人 $28
甜版一樣有，不過都係一樣邪惡，以榛子醬加 3 大粒棉花糖同香蕉烤，吐司裏材料半融，熱辣辣的朱古力醬好香甜。
美國隊長 $35（普通）、$42（勁量）
它是店裏的 best seller 之一，4 款基本芝士裏還加了意式肉醬、菠蘿、煙肉及焦糖洋葱，焦糖洋葱甜味同香口嘅煙肉同芝士味幾夾。
KALA Cheese Toast Specialist
地址：荃灣荃興徑 4-6 號地舖
電話：3706 5432
營業時間：12nn-12mn
收費：只收現金，不設加一
交通：港鐡荃灣站 B 出口，步行 5 分鐘
泊車：路德圍設咪錶位
平均消費：$40
