你覺得邊種食物最有秋冬嘅味道？小編就話係栗子喇，尤其係天寒地凍嘅時候食到暖烘烘嘅炒栗子，成個人 warm 哂！我估，中村藤吉緊係睇中呢一點，所以以栗子做秋冬特選嘅主題，推出秋栗丸十芭菲 (HK$108)、栗子金磚蛋糕 (HK$33) 以及秋栗抹茶羊羹 (HK$108)。
由 10 月 1 日至 12 月 31 日，茶室會供應秋栗丸十芭菲。芭菲採用名古屋愛知縣嘅涉皮栗，將味道比較苦澀嘅涉皮栗用糖水煮過之後，變化為軟嫩香甜嘅栗子，再配搭12款食材，包括蕃薯蓉、糖漬栗子、抹茶雪糕、焙茶啫喱、自家製栗子忌廉等，用料十足嘅芭菲層次分明，充滿濃厚秋日氣息。
而禮品部都有加到栗子入糕餅度，熱賣嘅金磚蛋糕加入咗原粒涉皮栗，成為期間限定栗子金磚蛋糕(HK$33)。而抹茶羊羹都加入涉皮栗子粒，令秋栗抹茶羊羹(HK$108)口感十足，中村藤吉建議佐以抹茶享用嘅。呢兩款糕餅都係期間限定來，10月至12月先有喔！
仲有幾日先到10月，小編都想快啲試下栗子同抹茶呢個新組合呀！
中村藤吉
地址：尖沙咀彌敦道 100 號The One 18 樓
電話：2426 6111
營業時間：11am-9:15pm
想睇更多？即上 甜品/ 尖沙咀 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
