究竟呢杯嘢，我應該當佢係雞蛋仔定雪糕呢？食咗先講，嘩！好多層次唧！我手上嗰杯抺茶，黑芝麻雞蛋仔唔止係雞蛋仔，裏面仲有蠱惑，中間居然有麻糬，好煙韌唧！雪糕底係自製抺茶雪糕，最正係淋咗啲濃味抺抹茶醬上去，甘甘濃濃，裏面仲有蘋果柚子奶凍、檸檬脆脆，我真係好努力，好努力，先 KO 到佢。
另一款 Fight wolf，係朱古力迷一定要叫嘅，雪糕係貪心精嗰 friend，扭紋味，一邊係 60% 黑朱古力，另一種味係意大利低脂雪糕，我最欣賞係佢居然有焦糖香蕉喺裏面，咦！仲有啲醒神的酸香嘅？原來仲有熱情果奶凍 balance 下個味，正正正。
難得嚟到，雖然飽到暈，但傳說中嘅臘腸雞蛋仔無「奶油」唔試㗎！真係加咗臘腸碎做㗎，不過食落似 becon，有油香，鹹鹹地同雞蛋仔都幾啱。
唔記得講，呢啲咁有創意嘅甜品，係 Winnie 創作㗎，我後面好勤力咁唧雪糕嗰個就係嘞。佢係法國藍帶學院畢業生，簡單如雪糕同雞蛋仔都當米芝蓮出品做，咁認真要出口讚，不過唯一美中不足係，太大杯囉，我呢種弱質女子食唔晒呀！
Oddies
地址：灣仔灣仔道 149 號 1F 地舖
電話：9551 7972
營業時間：星期二至日 1pm-10pm，星期一休息
歡迎你 like 我哋 U Food Facebook Page / U Food Instagram ，取得我哋更新更快嘅資訊！
