今年，打低長期處於人氣巔峰嘅一定係 ice pop，上兩星期我先仆到去希雲街食，那邊廂原來灣仔仲有一間新新哋嘅雪條店，俗語有話：有食唔食，罪大惡極，我當然唔想多添罪孽，喺 400 ℃ 嘅高溫下，行兩個街口去為大家以脷試法。
成間舖白白淨，空間就夠呀，但唔見雪條櫃嘅？得個好似更亭咁嘅窗口坐咗個美少女喺度，舖頭後方就有隻窗仔，好新秘啊！原來想啲雪條雪凍啲，所以同更亭裏面個美少女落單，條雪條就喺窗仔度 load 出嚟，枝枝都凍到...
我有驚喜大發現呀！就係下面嗰枝粟米味嘞。我一向係勇於嘗試嗰批，見水牌上面有枝 Corn Sweet Corn，老虎都要試，等我㗳真啲形容吓個味...哎...哎...陣味好熟悉...嗡到嘴唇邊...哎...哎...Bingo，係日本嗰啲粟米忌廉湯，不過係少少甜版本，幾好食喎，最抵死係裏面真係烘乾咗嘅麵包粒，加埋呢招，真係超似，嚟到一定要試。
我用咗 3 分鐘去細心欣賞個水牌，咦！都好多橙味嘅雪條喎，我唔怕生冷，再為大家試下先，Orange Campari 係加咗橙酒，都淡淡酒味；我第二最愛，就係Choco Banana，原來個 base 係朱古力味 gelato，少少 creamy 中間有蕉肉。
我仲試咗呢度嘅新產品 ice scramble，係老闆娘自家研發，有少少似刨冰，又有少少食 smoothie 感覺，論論盡盡怕食雪條整污糟衫，不妨試下呢味啦。
Ice' Licious
地址：灣仔軒尼詩道 263 號新軒尼詩大廈地下
營業時間：11am - 10pm
電話：2162 5261、2162 5295
歡迎你 like 我哋 U Food Facebook Page / U Food Instagram ，取得我哋更新更快嘅資訊！
