由即日起至 6 月 30 日，南小館以「傳統上海新滋味」做主題，挑選咗 3 款上海嘅地道菜式，加入新嘅元素，煮成 3 款新嘅菜式：為牛肉脆油條(HK$58)、香滷千層峰(HK$38)、年糕紅豆脆卷(HK$28/4件)，最令人期待嘅就係香滷千層峰。傳統嘅做法係廚師將豬耳煮熟，用滷水、香料醃製兩個鐘，再等到豬耳入味、變軟後再逐塊加壓造成千層峰。而南小館用上海米醋、鎮江醋、鮮露、辣鮮露及花椒油等共 9 款香料，調製成鹹鮮味嘅秘製醬汁，既有麻香又有微酸嘅醒胃感，爽呀！
另外，南小館亦推出全新水果氣泡蕎麥冰茶(HK$26/杯)，分別有春日野莓，清幽蘋果及繽紛西柚三款選擇。喺 4 月 30 日前惠顧以上「傳統上海新滋味」其中一款新菜式，即可以半價(HK$13)享用全新水果氣泡蕎麥冰茶一杯。
