推開門，完全唔似一般燒肉店格局，睇得出布置充滿心思，抽風系統更做得特別認真，每個烤爐下都設有抽風機，將油煙從爐下面抽走，再由牆身排出店外，確保不會令客人衣物沾上油煙味。
幾位老闆本身是位燒肉迷，所以對每個細節位都要求甚高，例如爐具是特別在日本特別訂做，火力均勻，烤肉時煙不會從四方八面而來，反而會從外圍排走；餐具也是從日本搜羅回來，雖然成本頗高，但難得是餐牌價錢親民，唔似一般燒肉店般食到一頸血。
牛肉主要來自日本山形和豐後兩個地方，一般是 A4 級數，而特上和牛更屬 A5，至於橫隔膜、牛舌等則選用澳洲和牛。由於每次都是購入半隻牛，而不是分開逐個位置入貨，所以餐牌上提供的牛部位超級多，例如少見的橫隔膜、臂肉、上腿內肩肉、牛柳肉中部。先講和牛橫隔膜，是厚切做法，所以特別有口感，一整塊放在爐上燒，再切成小塊食，肉味濃，兼帶點嚼勁。
鍾意食肥美少少嘅，可以揀特上和牛肉薄切，片片滿布油花，燒香後油香豐富到不得了，最啱 dip 日本雞蛋一齊食，口感更加香滑。除了和牛之外，仲有千葉縣黑豚肉、日本赤雞腿肉、南非鮑魚、扇貝等，食物種類好豐富，驚食唔飽？仲有一系列飯麵類，但提提你，全店只有 3 張餐桌，要食可能要預早 book 位！
特別推介：
和牛橫隔膜厚切 $220
少見的橫隔膜位置，整塊燒至半熟後切小塊食，口感很 chewy，肉味香濃，附上的 3 款醬汁分別是酸汁、味噌、自家調製的醬汁，後者帶薑的辛香，配燒肉清新不膩。
特上和牛西冷 $280
每塊都夾雜少許脂肪，肉質很嫩滑，同時不失脂香，入口近乎即溶。
特上和牛肉薄切 $280
塊塊滿布油花，燒香後油潤肥美，入口盡是脂香、肉香，蘸日本雞蛋品嘗，不但更香滑，更可減少膩滯感。
特上和牛柳肉中部 $320
牛柳的中間位，口感較柔軟，油份比較少，沒其他位置般油膩。
和風生拌牛肉 $140
選用牛臂肉位置，口感較結實，生吃可嘗到肉的鮮味，與生雞蛋撈勻食更加油潤嫩滑。
牛筋伴黑薯糕汁煮 $75
餐牌還有以牛入饌的菜式，像牛筋伴黑薯糕汁煮，內有牛腩、牛筋和黑薯糕，煮得軟腍入味，作餐前小食不錯。
牛尾拉麵 $90
湯底用牛骨熬 4 至 5 小時而成，啖啖充滿肉香，麵條比一般日本拉麵爽滑彈牙，忍唔住食多幾啖。
Niku Niku
地址：大坑施弼街 18-22 號地舖
電話：2997 0488
營業時間：5pm-till late
收費：現金及信用卡，設加一
交通：港鐵天后站 B 出口
泊車：附近咪錶位
平均收費：$500
想睇更多？即上 新餐廳 特集！
