Angelini在九龍香格里拉大酒店的閣樓樓層，一步入餐廳就可以看到無敵大海景，景色相當怡人！之後當然就是要看看午餐嘅 MEUN 啦！這裡嘅午餐有分成三道、四道和五道菜嘅餐牌，每位價錢分別是港幣$360、港幣$460和港幣$560。任君選擇，一定可以滿足到不同食量嘅朋友！
首先，當然是前菜。「青豆濃湯伴鮮蝦及香脆煙肉」，相信很多人都不喜歡食青豆，小編也是其中一份子！但這個湯卻完全不用擔心，廚師把青豆打成豆蓉，沒有了原有嘅草青味，更容易入口。而鮮蝦亦相當嫰滑，好似食緊「大蝦刺生」嘅感覺！最不得不提，一定喺香脆煙肉。可能不少「OL」都怕肥膩，但這次嘅煙肉不但卜卜脆，更有一陣陣咸香味，十分可口！
跟住嘅「煎帶子伴番紅花薯仔及香脆大蔥」，大大粒嘅帶子配以脆口嘅蔥絲，一軟一脆嘅配搭相當創新，平時「走青」嘅朋友絕對要一試！
然後就是廚師的手本名菜，「自家製芝士菠菜雲吞伴巴馬臣芝士忌廉及橄欖油」。這道菜嘅芝士香味非常濃烈，而芝士菠菜雲吞的外皮更加喺廚師自製，所以好薄好薄，唔會有平時好粉嘅感覺！不過最吸引小編嘅就喺那塊薄薄嘅芝士脆片！一份只有三塊，真喺相當唔夠喉！
接下來，就有「低溫煮牛面頰肉伴香濃蘑菇汁及青蔥」。牛面頰這個食材相當少見，大廚更是每天用8-9小時新鮮烹調這些牛面頰，而且用了時下很流行嘅「Slow-cooked」技巧，令牛面頰嘅肉質有點像牛腩，但口感再爽一點，完全唔會痴牙！
最後當然唔少得甜品啦！「朱古力焦糖布丁蛋糕伴香梨雪葩」，這個朱古力焦糖布丁蛋糕其實與「心太軟」十分相似，而香梨雪葩就喺整道甜品嘅亮點！雪葩嘅酸味配以朱古力嘅甜味，令人唔會有好漏嘅感覺！不過朱古力都帶有一點點苦澀嘅味道，所以唔食黑朱古力嘅朋友要留意啦。
飲飽食醉後，靚仔大廚重會親身與一眾食客見面，希望可以聽到客人對食物嘅意見，十分有心！
文/Kanelle
Angelini
地址：尖沙咀東部麼地道64號九龍香格里拉大酒店閣樓 (尖東港鐵站P1出口)
電話：2733-8988
營業時間：
星期一至日：12nn-03pm, 06pm-11pm
（所有價目需另收加一服務費）
