第一站：蘭芳園
來香港，梗係要食茶餐廳啦！光洙真係識搵，第一站就來到在結志街逾 60 年歷史的蘭芳園。一早來到，光洙就睇中港式早餐 A 火腿通粉煎蛋腸仔同港式絲襪奶茶。不過，如果 UFood 小編帶路，就梗係叫佢食件店中名物咖央西多士同蔥油雞扒撈丁，咖央味香甜，多士香脆﹔再加埋個十多年前自創的撈丁，好味到暈。少不了當然是來一杯回魂奶茶，用上斯里蘭卡「季後茶葉」沖製，配埋馬來西亞淡奶，幼滑醇厚。
蘭芳園 (老店)
地址：中環結志街 2 號及 4A-6 號
電話：2544 3895
營業時間：8am-8pm
第二站：威記粥店
之後，光洙同 Fei 來到士丹利街的老字號粥店，睇住師傅整油炸鬼睇到唔貶眼，好快趣就打算叫牛肉粥同油炸鬼一條。威記同蘭芳園一樣由大牌檔做到入舖，在中環已經 over 70 年。佢地的粥底用新米加舊米煮成，由 2am 煲到 6am，啖粥入口富膠質亦有咬口。呢度的油器腸粉蘿蔔糕全部自家製，油炸鬼由搓麵團做起，而且逐少逐少炸，新鮮熱辣。
威記粥店
地址：中環士丹利街 82 號
電話：2551 5564
營業時間：7am-7pm
第三站：小雨天
光洙同 Fei 來到同樣位於士丹利街的小雨天，望到食客們個個狼吞虎嚥，光洙都好想食，最後叫咗個豬肝麵！小編亦親身試過，豬肝麵食落雖然唔錯，但係同小雨天招牌嘅豬軟骨泡飯相比，當然係後者較為出色啦！另外，小雨天的餃子亦非常有名，尤其是椰菜豬肉餃子，配埋浙醋一齊食，夠晒滋味！
小雨天
地址：中環士丹利街 74-78號旺興大廈地下
電話：2815-6616
營業時間：7:30am-9:30pm
第四站：天龍軒
玩完中環，今次過海去全港最高的中菜廳食下點心小菜。來到 ICC 102 樓 Ritz-Carlton 酒店的米芝蓮二星餐廳天龍軒，光洙同 Fei 大擦巨形蟹箝、金箔蝦餃同鹹水角，食到咀 lam lam，最後仲入埋廚房學整鹹水角。天龍軒好食的仲有叉燒，用高貴的西班牙豚肉炮製，入口軟滑富蜜香。小編覺得佢個鮑魚撻、腸粉同蝦多士都好得，當然知個雲端景仲得！
天龍軒
地址：尖沙咀柯士甸道西 1 號環球貿易廣場 (ICC) 香港麗思卡爾頓酒店 102 樓
電話：2263 2270
營業時間：星期一至五 12nn-2:30pm，6pm-10:30pm，星期六、日及公眾假期 11:30am-3pm，6pm-10:30pm
