一杯雪糕，大家通常只會 Focus 雪糕部分或 toppings，好少理個 cone。但尖沙咀新開的「放牛牛」，就特別在雪糕筒上玩花臣，雪糕筒唔止色彩繽紛，更有「地、水、火、風」不同主題，掀起新潮流。
店長推介 $42/ 款
圍繞地、水、火、風主題設計和配搭，每款雪糕都有三款 toppings，有層次感，可選雪糕筒或杯裝。
這 4 款店長推介，並非浪得虛名，而是從頭到尾都按主題設計。最受歡迎的「火」，雪糕筒係紅色的，遠睇似一個火把！內有朱古力雪糕、士多啤梨及朱古力酥餅，最頂層是粉紅色棉花糖，超搶眼；緊隨人氣 No.2 的有「風」，個人覺得最 Fancy，雪糕筒係彩紅色！配上薰衣草雪糕，加埋威化花花、蜂蜜窩夫及菠蘿粒，輕易冧暈少女。
至於「水」和「地」，前者以藍黑調為主，黑色雪糕筒上有藍色圓形圖案，海鹽雪糕配以墨汁酥餅、藍莓及泡泡糖。後者則是型爆的迷彩 cone，襯埋粟米味雪糕、燒日本甜薯、椰青肉及牛油酥餅，好豐富。
雪糕筒唔止得個樣，仲幾好食！用料不馬虎，窩夫筒以麵粉(產地後補)、法國牛油、日本蛋及美國蛋等炮製，加入法國產食用色素，變出色彩及圖案。先以機製再用人手捲成筒形，每個都略有不同，好有手工 feel。質地雖較厚身，但入口鬆脆，帶蛋香及牛油香。
雪糕同樣落本炮製，以富良野 3.7 牛奶做雪糕漿，香濃又 creamy，還加入真食材調味，如日本粟米、日本海鹽、乾薰衣草及法國 72% 可可粉，味道天然。綿花糖、牛油酥餅、泡泡糖、蜂蜜窩夫等亦是自製，雪糕店來講，算有誠意。
放牛牛
地址：尖沙咀麼地道 32 號地下
電話：2886-0448
營業時間：星期一至日 11am-11pm
