有種芝士一出現，就會勾起好多法國人的開心回憶，登登登凳，就係 Raclette cheese！
居港的法國人 Valerie 及 Jeremy 話：「我哋細個去親滑雪，一定會食 Raclette。因山區好凍，食完 Raclette 飽肚又暖身，好開心。」時至今日，當然唔止山區有得食，全法國都有 Raclette 蹤影，但習慣上，仍會留待冬天才品嘗。其他歐洲國家如瑞士、意大利、奧地利及德國，都有大批 Raclette 粉絲。Chez Patrick Deli 近日亦推出這菜式，跟足傳統，用 Raclette 機炮製，這種牛奶芝士平日無咩特別，但只要放在 Raclette 機上受熱，便會釋放誘人芝味。機器頂部的發熱線會令芝士融化，大廚連隨將變軟的芝士用刀刮下，覆蓋在煮熟的薯仔上，有如一張芝士被，軟綿綿好過癮。
菜式伴有多款切肉，像 White ham、Bayonne Ham、Rosette 及 Saucisson，還有沙律及醃青瓜等，都幾豐富。Valerie 話：「食 Raclette 好 casual，可以配薯仔啦，或者用切肉夾住芝士食都得。餐廳用的機器太大部，在家會用較細部的 Raclette grill，機上有多個小鐵 pan，將 Raclette 放上去，等芝士熱融就食得。」
Jeremy 就話法國人通常會等放假才食 Raclette，因為要慢慢食，同埋屋企人、朋友一齊食，氣氛好熱鬧。「溫馨提示，Raclette 好食但好膩，記得揀水果沙律、雪葩一類做甜品，千祈唔好再食朱古力蛋糕及檸檬撻等，否則個胃肯定好辛苦。」
Chez Patrick Deli
地址：灣仔港灣道 28 號 Brim 28 灣景中心 1 樓 5 號舖
電話：2877-0121
營業時間：星期一至五 11am-11pm；星期六、日及公眾假期 10am-11pm
備註： Raclette 菜式供應期由即日至明年 2 月
