我唔明，我唔明，點解上帝要創造甜品，但又要發明佢嘅天敵脂肪喎？都唔公平嘅，搞到我哋啲凡人嘴裏說不，身體卻很誠實，左手加右手起勢咁猛將糖份送入口，甜品之神啊！呢一刻我好想讖悔啊！請原諒我又忍唔住起勢咁食食食甜品。
一日最衰都係個 pancake 啦，整到鬼死咁靚，特別係嗰款雜莓呀！啲士多啤梨、藍莓呀，放起塊脹卜卜嘅班戟度，一上枱我 feel 到佢同我單晒眼，鬼死咁誘惑，真係好難唔狠狠咁咬佢哋一啖，原來個班戟係呢度嘅皇牌，做班戟嘅蛋漿係日本嘅特別配方，用日本進口嘅材料，上面又軟又滑嘅忌廉用日本純忌廉打成，pancake 入爐焗過，鬆化夠脆蛋香又唔錯，忌廉滑嘟嘟，神啊！請給我多吃多一份。
個 pancake 只係前奏咋，呢度最招牌嘅係嗰款好鬼花俏嘅彩虹蛋糕之塔，佢起日本超人氣，真係仲靚過李嘉欣，大家睇真啲，個塔係由 12 件蛋糕組成，每件蛋糕嘅花紋係甜品師親手畫上去，水玉、橫間、蘇格蘭格仔、純白靚到有少少罪過喎，佢哋唔止得過靚字，口味都唔錯，有檸檬蜂蜜、法式布甸、藍莓乳酪、抹茶朱古力、牛奶、芒果、栗子、朱古力同原味，蛋糕好鬆軟又有少少濕潤，個 cream 超超超輕、又超超超滑，喺心儀嘅女孩生日之時，送呢座彩虹塔同佢賀壽，就算個女仔個心係石頭做肯定都會即時會為佢軟化，我衰起佢真係無嘢講。成座塔食唔晒，其實可以斷件柯打，生唔生日都可以吞佢落肚啦。
甜品之神啊！我仲要告解，因為個午餐又大份又抵，當日我仲忍唔住偷偷哋柯打咗一個，真係激死人，由中午直落下午茶，我自己都覺得過分，不過呢度好好坐啫，有極有少女 feel 嘅法式裝修又對住銅鑼灣避風塘，午後坐喺度真係好鬼疏肝，長少少脂肪都抵。
Sweets Rococo & Café
地址：銅鑼灣告士打道 255-257 號信和廣場 UG07
電話：2805 8622
營業時間：11am-9pm
備註： Roll Cake Tower 須早1日預訂
(原文摘自《U Magazine》ISSUE 474、文：小儀、圖：Nova)
