別以為大埔區，只有大路港式料理。匿藏於大埔翠怡花園的「鮨一」則有點例外。小店由兩個大埔友蕭生和大廚阿恆所開，二人曾跟拍擋在尖咀開料理，有感租金昂貴，大埔區又少有像樣的料理，遂另立門戶，決戰大埔。
刺身大大片，壽司大大件，表面港式，卻難得大部分食材都用日本新鮮貨，亦按時令入一些區內少有的矜貴海產，像伊佐木、魴鮄魚、針魚、香箱蟹，入貨數量有限，堅持不留過夜，跟足中環尖沙咀高檔料理水料。連野菜如苦瓜、番茄、南瓜、大葱等，都捨得用日本貨。
刺身有抵讚位，別家小店為省時及方便，會用斬件包裝或預先蒸製但這裏，但這裏的廚師寧花多一點功夫和成本，拿原條三文魚油甘魚在內自家劏；八爪魚也自家蒸切；亦以原隻北寄貝起殼自家切片，保持鮮嫩，故刺身都幾食得過。
食物款式多多，刺身壽司串燒一品料理揚物炒飯烏冬，滿足街坊需要。款式有大路，有新意，像辣酒煮廣島蠔、吉列荔枝海老。串燒亦是自己串的，牛舌只取最爽的牛脷芯。「我地同食材供應商關係好，對方會留好嘅日本貨俾我地。夜晚落柯打，第二日搭飛機嚟，五六點就運到舖頭。」蕭生說。
時令刺身
*北海道秋刀魚 $168 起：魚肉肥美甘鮮，魚油甘香。
*加拿大牡丹蝦 $78 兩隻：大隻爽甜，夠彈牙。
*北海道 XL 帶子 $35 兩片：清甜不腥
*大拖羅 $280 四片：肥美鮮味，入口化出豐富魚油。
*鹿兒島針魚 $168 起：魚味清淡，帶腍身。
*北海道北寄貝 $128 起：原殼切片，帶海水鮮味，勁爽。
特上十貫目 $268 起
牡丹蝦壽司、蟹膏蟹棒、北海道馬冀海膽、三文魚子、火炙鰈魚邊、活赤貝、鮮帶子、大拖羅
香箱蟹 $168
即雌性松葉蟹，11 月至 1 月才有得吃。蟹膏豐富又甘香，蟹籽超多，用紫菜包着食更爽口，蒸蟹腳肉質細嫩。
吉列荔枝海老 $58
虎蝦蝦膠包裹原粒荔枝炸，蝦膠彈牙，荔枝清甜多汁，平衝膩感。
煙肉帶子卷 $48 串、豚肉蒜芯卷 $18 串、煙肉荔枝卷 $22 串
串燒配搭味道一重一淡，肉香夾清爽。
沖繩苦瓜、番茄、番薯、豆腐、青椒仔、舞茸，全用日本貨。
鮨一
地址：大埔太和翠怡街 3 號翠怡花園 16 號舖
電話：2656 6634
營業時間：12nn - 3pm，6pm - 11pm（星期二休息）
收費：現金及信用卡，晚市設加一
交通：太和站 B 出口步行 5 分鐘
泊車：翠樂街設咪錶位
平均消費：$150
(原文摘自《U Magazine》)
