每到蟹季，坊間有不少大閘蟹套餐出籠，既有原隻清蒸大閘蟹、又有蟹粉菜，最啱大夥兒齊齊品嚐！
1. 酒店平蟹宴
逸東酒店的大閘蟹，向來都有口碑，8道菜大閘蟹餐焦點在3隻陽澄湖大閘蟹上，每隻足足有4 両重，合共12 両，簡單清蒸已嘗盡鮮味，加上今年大造，蟹膏甘香豐腴，質素高。套餐更有 5道蟹粉菜，當中不少加入貴價用料，包括養顏燕窩、8頭大虎蝦、黑松露，所有蟹粉全部人手起膏拆肉，並加入薑米、果皮等鏟成，味道香濃，好揼本！
配搭也用心，像富貴火腿伴蟹影蝦球，乩大大隻虎蝦挑筋去皮，經油泡後質感爽彈鮮甜，拌以濃厚的蟹粉增加鮮度，大廚更以糖煮金腿伴碟減輕蟹粉膩感。另有fusion 的黑松露蟹粉稻庭烏冬、蟹粉金湯燴燕窩，及經典的蟹粉小籠包、蟹粉扒津白，超有分量！
江蘇陽澄湖大閘蟹宴 $998 兩位
套餐包括明爐燒腩肉、蒜泥青瓜、脆皮素鵝、清蒸大閘蟹(每位3隻)、蟹粉金湯燴燕窩、富貴火腿伴蟹影蝦球、蟹粉扒津白、生拆蟹粉小籠包、黑松露蟹粉稻庭烏冬、薑茶湯圓。
逸東軒
地址：九龍彌敦道380號逸東酒店低層二樓
電話：2710 1093
2. 社企西式蟹菜
近年興起將大閘蟹西化，變成一道道擺盤精緻的西菜，中環會這間主打歐陸菜的寸人社企，首次將大閘蟹入饌，精挑安全乾淨的荷蘭大閘蟹，炮製蟹膏多士、白酒煮大蟹肉意粉及法式邊豆蟹肉湯，食材9成以上用外國貨，像清嫩無渣的法國邊豆、法國Grand Motard生蠔，還有本地有機菜等，每朝從鄰近的結志街街市入貨，新鮮度大增，5道菜的大閘蟹餐只需$168，每個餐更會捐出$20幫助心光盲人院，又抵食又做到善事，無理由唔支持！
5道菜大閘蟹套餐 $168位
-蟹膏多士
-法式白酒煮大閘蟹肉意粉
-法式邊豆蟹肉湯
-法國Grand Motard生蠔
-法式焦糖燉蛋雪糕
南非蜜樹茶
加$10便可揀飲花茶，這款帶蜜糖甜香，不錯。
中環會 Le Club Central
地址：中環威靈頓街 98號翡翠中心四樓全層
電話：2117 0788
備註：凡在團購網（如BeeCrazy、funshare）訂購大閘蟹套餐，均可免加一收費，另須於1天前訂座。
3. 經典上海菜
小南國的大閘蟹宴蟹粉菜式雖不多，只得蟹粉蟹肉羹及蟹粉小籠包2款，但勝在質素穩定兼有風味，每人均有2 隻4.5 - 5両的太湖大閘蟹，全都肥美爆膏，吃得滿手蟹油好滋味；另有不少經典上海菜選擇，如招牌的椒鹽小黃魚，原條黃魚由福建運到，經微凍技術來保鮮，味道比冰鮮更好，以辣椒、檸檬等醃３小時再炸香，脆卜卜好香口；另一款新推的江蘇烏醋香肉，以頂級五層腩炮製，外圍煎至焦並加鎮江醋、冰糖等炆90分鐘，入口即化，滿口油香。這裏裝潢格局雅緻不老套，吸引不少年輕情侶或夫婦孖住來拆蟹！
大閘蟹套餐 $458 位 (兩位起)
鎮江肴肉/山珍雲耳/糖醋小排骨/四喜烤麩(4選2)、清蒸江蘇大閘蟹(每位2隻)、生拆蟹粉蟹肉羹、椒鹽小黃魚、江蘇烏醋香肉、清炒時蔬、生拆蟹肉小籠包(每位2隻)、薑茶紫糯米黑芝麻湯丸。
大閘蟹禮盒套裝
$528 有4隻5両太湖大閘蟹、古越龍山青瓷裝5年加飲酒500ml、蟹醋及小南國$100餐飲禮劵等。
上海小南國
地址：銅鑼灣勿地臣街1號時代廣場食通天11樓1103號舖
電話：2874 8899
(原文摘自《U Magazine》)
更多2014 大閘蟹情報：大閘蟹 特集
