近年飲食界掀起健康潮、環保風，令素食抬頭，餐廳選擇愈來愈多，日曆上的星期一，也從鬱悶的Blue變成健康的Green，這個小引子，成功令不少人，在素之路上踏出第一步。來聽聽他，或她，還有他們談吃素。
顏卓靈（演員）食素年資：非全素食者
以前沒有食素，但也喜歡多菜少肉，覺得食肉好似在體內積聚毒素。認識 Green Monday 之後，慢慢由每星期一食素，到其他日子都食多咗菜，盡量少肉。如果食素時，會盡量少食葱蒜五葷，因味道太濃，我較喜歡清淡味道，食出食材的新鮮，牛奶也少飲。試過食素後，發現原來無影響跳舞，依然好有能量，亦因研究素食食譜，而發現素菜可以好多款式，不怕悶。
推介餐廳：
功德林上海素食
地址：銅鑼灣告士打道 280 號世貿中心 10 樓
電話：2890 3127
Human （婚禮統籌師）食素年資：超過 20 年
食素習慣：蛋奶素者，戒五葷
我全家人都係食素，爸爸、媽媽、我同細佬 Leo，一齊住的姑姐都係，素食親戚仲包括婆婆，姨丈阿姨等。最初係媽媽食素，因為佢信佛，仲煮得一手好齋菜，中式西式都有，以前仲開過齋舖。爸爸鍾意食，又會跟媽媽去佛堂，結果亦成為佛教徒。所以，由細到大，去佛堂、食素，對我哋兩姐弟來說，來得自然。身邊的朋友、同事，對我食素好支持，食飯會幫我睇定 Menu，驚我無嘢食，丈夫雖然係食肉，但會遷就我。
LEO （資訊科技員）食素年資：超過 20 年
食素習慣：蛋奶素者，戒五葷
我同家姐差唔多時候開始食素，一直都覺得食素好好，未食素前，其實都唔多食肉，所以無唔適應。媽媽煮的齋菜好食，最鍾意食南瓜素翅、或者用腐皮做的素雞髀，以前出街食無咩選擇，來來去去都係傳統齋舖，不外乎羅漢齋、齋滷味、南乳粗齋，再唔係就食番茄蛋飯、豉油皇炒麵，好悶！所以我一係返屋企食飯，或者出街食會揀西餐，多啲素食選擇。
推介餐廳：
志蓮素齋
地址：鑽石山鳳德道 60號南蓮園池龍門樓
電話：3658 9388
彭秀慧（舞台劇演員）食素年資：非全素食者
我有食素的習慣，做了 Green Monday 大使後，每星期一都係個指標不食肉，而平日如果係自己煮飯，會盡量清淡，多菜少肉甚至無肉，因為我都好喜歡食瓜菜豆腐同蛋。蔬菜配搭簡單，就已經好食，好似節瓜粉絲加冬菇、番茄煮蛋，一啲都唔難煮。食少啲肉，健康啲，又可以清腸胃，加上發現食肉原來會傷害地球，不環保，我亦希望減少殺生。
推介餐廳：
樂農
地址：灣仔軒尼詩道 99 號彰顯大廈 1 樓
電話：2529 3338
糖妹（歌手）食素年資：非全素食者
每星期至少有兩、三日食素，食蛋奶素，有時會戒五葷，最鍾意食腐竹煮的菜式，同埋叫羅漢齋多木耳咁，簡單以蒸炒為主。食素後發現皮膚好了，新陳代謝都好咗，更認識一班固定的半素食朋友，去對方家煮飯也多了素食主題。
推介餐廳：
The Herbivores
地址：中環士丹頓街 35 號地下
電話：2613 2909
Janet（瑜伽導師）食素年資：4 年
食素習慣：蛋奶素者，盡量少食蛋，戒五葷細個嗰陣，一食啲比較大件的肉類，好似中式牛柳、豬扒咁，會瞓唔着，身體覺得好唔舒服，自此之後，都習慣多菜少肉。後來到我做瑜伽導師，因瑜伽裏面有教人不傷害，所以萌起食素的念頭，4 年前決定食全素。講畀老公聽，佢好接受，無幾耐仲一齊食素，估唔到係我父母最反對，話怕我無營養，但依家連爸爸都比以前多菜少肉。
推介餐廳：
紫來坊素食料理
地址：銅鑼灣伊榮街 7-11 號欣榮商業大廈地下 1 號舖
電話：2881 5983
Edmond（城市農夫）食素年資：3 年多
食素習慣：蛋奶素者，戒五葷我屋企食飯一向多菜少肉，幾年前太太開始食素，發覺兩個人食飯有問題，好似響餐廳叫一碟菜畀佢，一碟肉俾自己，我會食佢啲菜，但佢唔食得肉，變相佢食少咗，我就反而食多咗，咁就不如同佢一齊食素。最記得開始食素時係冬天，然後又因為唔識食素而變成營養不良，瘦咗好多，成日面青青咁，好無精神。後來知道食素唔止食菜，而係均衡營養。我做種植工作後，教過唔少學生，佢哋學懂更珍惜食物，依家都會試吓食素，係個好開始。
推介餐廳：
禾之家素食
地址：太子花園街 224 號 C 地下
電話：2393 6391
Felix（咖啡師）食素年資：23 年
食素習慣：初期是蛋奶素者，戒五葷；現在是盡量避免進食蛋奶，對待五葷反而沒以前嚴謹。
因信佛而食素，是不想殺生。對食物，我沒太大執着，基本上所有蔬果都會食，最重視反而是新鮮度，只要新鮮，簡簡單單烹調，已經好好食。愈來愈多人認識素食、嘗試素食，坊間選擇、素菜款式多咗，係件好事，我開素食 cafe，都想將自己相信的、選擇的，同大家分享，見到客人反應好，有滿足感。最想太太、BB 都可以同我一齊食素。
推介餐廳：
東后齋
地址：銅鑼灣登龍街 28 號永光中心 25 樓
電話：2337 7733
--
本地素食者過百萬！早前，有調查訪問了 1,006 名香港人，發現幾乎每四名港人便有一個有建立規律的素食習慣，其中 12% 被訪者每星期素食一天，8% 近半時間會選擇素食，而全素食者則為 3%。將三組加起來共為 23%，亦即160 萬港人有至少每周素食一天的習慣！從環保角度，按照每人每星期素食一天減碳 0.213 噸二氧化碳的公式，再計算這 160 萬人的素食頻率，每年能為地球減少90 萬噸二氧化碳，相等於 4,000 萬樹木的碳吸收量。
(原文摘自《U Magazeine》、文：Pam、圖：Ken、Keeyau、Lamlam)
更多素菜素食go green情報 : 素菜 特集
