Tapas 真係火紅！紅到——中菜館！位於Midtown 8 樓的「小蝶」，店名語帶雙關，除了說明這是中菜館「采蝶軒」的 young 版，也道出這兒賣小碟菜式！打開餐牌，果然，大菜如 XO 醬菜心蝦仁帶子、菠蘿咕嚕肉等都變成 tapas size，每款數十元，即使人少少，都可以試多多款！「兩小口外出吃中菜，最難點菜，所以就有小碟的構思，分量相當於半份例牌，選擇多之餘，又不會浪費食物，年輕客人最受落。」老闆娘 Jessica 說。她曾於外國留學，同時畢業於藍帶廚藝學院，父親於 80 年代在英國和內地開設多家中菜館，金鐘太古廣場的采蝶軒就是她兩父女的心血結晶。
出位大江南北菜
今次為了走進 Midtown 這新地標，Jessica 專程請來上海著名設計師負責室內設計，吊燈、牆櫃、窗口、裝飾餐碟都滿是蝴蝶蹤影，感覺優雅大方。菜單更大費周章，花了近一年時間改良，包攬大江南北，既有生炸脆皮乳鴿等粵菜，亦有重慶石鍋豆花魚、黃金獅子頭等新派川滬菜。大廚盧師傅出身於利苑，幾年來在采蝶軒位於上海、揚州、南京等內地分店任職，功夫紮實之餘，對粵滬川菜手到拿來。一改傳統中菜「大堆頭」製法，小碟更考師傅手藝，賣相要精美，配搭也要有創意。像咕嚕肉，將其釀進菠蘿包中，酸甜過癮；苦瓜呢，做成鹹味梳乎厘；還有「牛頭到尾」，以紅酒炆牛雜，中菜西做好出位。稍後店方更推出加入茶葉調製的特色雞尾酒，飯前飯後於酒吧飲返杯 chit chat 一下，將 happy hour 意念融入中菜世界，教人期待！
牛頭到尾 $68
以紅酒燴煮，中式牛雜西式做，牛肚、牛尾、牛脷飽吸醬汁，好惹味。
菠蘿、菠蘿咕嚕肉 $58
將菠蘿咕嚕肉放在中式包中，再裹上菠蘿皮，手工精巧，酸、甜、酥、香，過癮！
三小碟 $88
有冰鎮花雕鮑（右）、滷水牛𦟌粒、法芥千層薈（左）；千層薈是炸腐皮粒，甘香有質感。
XO 醬菜心蝦仁帶子 $108
以傳統玉朁蝦配搭慢煎帶子，賣相精美；大廚每天早上親自到鵝頸橋街市買海鮮，保證新鮮。
落日太湖映明珠 $38
賣相美如甜品的南瓜汁椰菜雜菌包，配搭新穎。
重慶石鍋豆花魚 $78
麻辣魚柳以自製豆花伴吃，嫩上加滑。
鳳尾蝦芋角 $33
特別在以芋蓉包裹原隻海蝦、肉粒等再炸，食起來既酥脆鬆軟卻不油膩。
白雲苦瓜 $38
以苦瓜做主角的鹹味梳乎厘，味道甘甘哋，質感輕飄飄。
黃金獅子頭 $58
鬆化獅子頭中包着鹹蛋黃，肉香中加添甘香。
小蝶 Zen too
地址：銅鑼灣 1 號金朝陽中心二期 Midtown 8 樓
電話：2845 4555
(原文摘自《U Magazine》、文：Sliva、yoyo、圖：Chow、Lamlam、Nova)
