我最愛護地球，所以我一向支持低碳、有機同公平貿易，同埋身邊吃素嘅朋友又多咗，呢間有機餐廳舖連雜貨店頭一開，我覺得佢哋 Eco-friendly 的概念幾好，嗱嗱臨同啲朋友嚟試。
第一次嚟，我已經畀呢度嘅氣氛秒殺咗，呢度係一條崛頭巷裏面，兩邊被好有本土特色嘅舊樓圍住，好多洋人或者街坊帶埋狗仔坐喺天井度歎咖啡、食沙律，節奏超悠閒。都唔似香港嘅，我係咪有幻覺？
唔理啦，咁正坐咗落去歎吓先算。唔坐由自可，一坐我直頭唔捨得走，因為突然殺咗個靚女出嚟招呼我，佢就係呢度嘅明星狗狗 PR 姐姐 Onna 嘞。佢超乖㗎，被我哋啲愛狗人士起勢咁毛手毛腳都無唔 alright，個個嚟到都忍唔住要抽下水。Onna 的出現原來同領養狗隻有關，餐廳的雜貨店充當寵物領養嘅平台，仲做埋暫託，Onna 同另外一啲待領養嘅狗仔就住喺雜貨店度，平時就喺餐廳對出嘅天井位置玩，店主希望食客同啲狗仔多啲接觸，可以送個溫暖的家畀佢哋，由於 Onna 太得意，佢已經變咗駐場明星狗狗，想綁架佢返屋企都唔得，咁我唯有下次帶埋 Dee Dee 同細佬佬嚟同佢玩。
食物方面，呢度梗係食有機嘢，素食之外仲有葷菜，咁齋唔齋民都可以一家親。店主 Stephen 話自己都頂唔住口淡淡，所以調味都好足，呢度啲嘢食好有 fusion feel，由日本、墨西哥、韓國，以至意大利、西班牙煮法都有，醬汁仲係 homemade 㗎，唔使擔心有機得嚟清淡度過咗火位。蔬菜會盡量用本地時令有機菜、海鮮係可持續品種，連肉只用美國、紐西蘭嘅，飼養期間無谷肥無用賀爾蒙，健康得嚟又環保又兼顧到美食道德。
而家咪好鬼興食羽衣苷藍（kale）同藜麥（quinoa），我第一次食就係喺呢度嘞。前者其實係洋人芥蘭，實淨有趙頭，食得出纖維素好高；後者好有可塑性，嗰日廚師就攞佢嚟扮飯，配埋啲用新鮮蔬果打嘅果汁，好有 detox 效果，做一日有機寶寶都幾爽呀。
Queen kale salad $108
Tomato Fried Rice (Quinoa) $128
Super Duo salad $118
Smoked salmon & spinach alfredo $168
Juice $48-58 杯
Locofama
地址：西營盤第三街福壽里 9-11 號
電話：2547 7668
營業時間：11am-10pm
(原文摘自《U Magazine》ISSUE 450、文：小儀、圖：Lamlam)
