世界盃如果屋企有得睇直播，最舒服當然是安坐家中，攤響梳化睇晒 64 場世界盃賽事，半夜睇波，宵夜自然唔少得，推介以下好味且方便易煮、甚至叮一叮就食得的美味拉麵同杯麵！
美味拉麵速遞
夜麻麻食一碗熱騰騰又香濃的拉麵，怎叫人不感動？仲可以足不出戶有專人速遞上門就更加加分！拉麵達人Meter Chan 經營的「家麵」網站，專營外帶拉麵 set，只需於當日朝早 10 點前落柯打，即日就會有專人送到，即晚就可以自煮做宵夜，方便到極！
外帶拉麵 set 有 3 款口味選擇，湯、配料和麵條的製法及材料都跟其拉麵店「隱家」相同，拉麵為生麵，即日用日本小麥粉鮮製，不經油炸，爽滑彈牙有小麥香；湯包由熬足 10 小時的原味豬骨湯底急凍而成，內裡還有香軟的豚角，另附調味粉、配料也講究，像蒜粒、芝麻用日本貨，味道特香，紫菜亦跟隱家的一樣，以壓碎的雞蛋殼印成字樣，成分天然。這樣原汁原味又足料的宵夜，無投訴了吧？
隱家白伝拉麵$53
豚骨湯味香濃，混入鰹魚粉更添鮮味，最正是有日本芝麻提味。值得一讚的是豚角做得好，鮮味比得上店內吃到的，唔會有陣雪藏味。
隱家黑伝拉麵 $63
湯底靈魂在於其以日本豉油、紅油及蝦米等調製的特製拉麵汁，濃厚的豬骨味中滲出鮮香的醬油甜香，好惹味。
隱家前伝拉麵 $73
豚骨湯拉麵加上師傅秘製番茄醬，茄味勁鮮濃，吃時撒上芝士粉及炸日本蒜粒，味道更香又不膩。
外帶紙盒由 Meter親自設計，Raw 得來又有型，一人前份量的盒中有齊配料，全部獨立包裝，放冰箱可保存 3 個星期。
家麵
網址：www.gamin.jp
訂購方法：於網頁落單，以 paypal 形式付款，10am 前落單可即日送貨，送貨時段為 6pm 前或 6pm-9pm。運費一律為 $48，滿 $500 免費送貨。
杯麵，識食既梗係食日本貨！
日清麵王豬骨味噌碗麵 $33.9/ AEON
必試首選，拉麵煙韌彈牙，帶微微鹼水味，似足拉麵店吃到的，以豬骨為主，味噌為副，特製成濃郁湯頭，豬骨味鮮明又帶味噌的甜香，自行加多隻窩蛋，好味得連湯都喝清光。
富山黑胡椒拉麵 $32.9/ Freshmart
黑胡椒拉麵是日本富山市獨有，這杯麵版跟足原著，全黑的湯頭散發出濃郁的黑胡椒香，攣曲的麵條夠彈牙又易掛湯，食落充滿胡椒的辛辣好香好濃，配料有薄叉燒、包心菜、蔥等。
日清行列店特濃白湯雞肉拉麵 $33/ Freshmart
麵條偏幼及腍身，配合清香的特濃雞湯底好夾，兼有濃郁的筍味，沒有很強的味精感覺，食完唔覺口乾，加上大量的雞肉和蔥，吃得滿足。
究麵濃味豚骨拉麵 $29.9/ AEON
雪白的幼身麵條口感 Q 彈，放在熱湯內都不會太軟身，掛湯力強，食落啖啖香濃的豚骨鮮味，湯底口感偏稠，內附豚肉片、香蔥、木耳等。
大碗裝辣烏冬 $37.9//Freshmart
喜歡辣味的，推介這款撈烏冬，先用滾水浸烏冬及配料，倒去水，再加入辣麵汁拌勻，烏冬入口滑嘟嘟又夠彈牙，質感極好，麵汁味道有點像韓式辣醬，辣得來帶少少酸香，好開胃。
Freshmart
地址: 銅鑼灣崇光百貨 B2 層
電話: 2833 8338
AEON
地址:鰂魚涌康山道 2 號康怡廣場（南）地下
電話:2884 6888
(原文摘自《U Magazine》文：winsome、winnie、圖：Ken、May、Jay)
更多世界盃餐飲情報：世界盃 特集
